اول حاجة هنتسأل عن الاسم قبل حتى ما نكتب اى حاجة فى موقع البلوج بتاعنا علشان الاسم غريب شوية
1. يعنى ايه مصاروة ؟
مصاروة هى جمع تكسير – ده اللى فاكره بصراحة من النحو بتاع ثانوى – لمفرد مصرى فى اللغة العامية المصرية
2. طب ليه مصاروة بالذات ؟
علشان احنا اعضاء فى الحزب الشيوعى المصرى و الناس اللى بيعملوا نفسهم فاهمين و عارفين خبايا الامور و اللى ذكائهم خارق للعادة لما حد مننا بيديله ورقة مكتوب عليها بالبنط العريض الحزب الشيوعى المصرى يروح هو غامز بعينه كده و يقولك " مصراوى انت .. فاهمك يا لئيم " فطبعا الواحد مننا احتراما منه لذكاء المواطن ده فمش بيعلق على الموضوع و ربنا امر بالستر بقى
فلما نفس الراجل و هو قاعد على نفس القهوة يشوف واحد مننا بيقابل واحد او اتنين او اكتر و ياخدوه على جنب يمكن عشان الفلوس اللى عليه او ورق امتحان بعد بكره اللى مذاكروش لسه فيقوم صاحبنا اللى قاعد على القهوة مميل على صاحبه اللى قاعد جنبه و يقوله " دول يا عم مصاروة .. اللى تبع المصرى .. حزب سرى يعنى بس انا بقى عرفتهم واحد واحد " و يرجع تانى و هوا حاسس بسلام و اطمئنان داخليان كونه علم و تأكد و توثق بأنه قد رأى توه اعضاء فى الحزب الذى سمع عنه كثيرا و درسه و نقده
و نحن تقديرا منا لدور هذا المواطن الصالح الذى لا يهدأ له بال حتى يرضى قلقه المعرفى فى اطلاق هذا المسمى علينا فقد قررنا تمجيد اسمه ليصبح اسم موقعنا من الآن " المصاروة "
3. و انتوا مين بقى يا حلوين ؟ – سؤال من المواطن الصالح المذكور فى البند رقم 2
عزيزى المواطن .. نحن اعضاء فى الحزب الشيوعى المصرى فى مرحلة الشباب و بنمثل المجموعة الشبابية فى الحزب و لو اخدت بالك من اللى كانوا بيدوا لـ " أ . م . س " ورق المذكرات لما كان مستنى على القهوة و هو قلقان كنت هتعرف الهيكل القيادى كله لينا .. حاول تفتكر كويس الشباب دول علشان لو قابلت حد فيهم مرة تانية يبقى هتعرفنا واحد واحد يا نمس و تبقى تغلبت بقدرتك الخلاقة و عقليتك الفذة وحدها على كل اجهزة الامن المصرية .. خلى بالك بقى على نفسك علشان فيه مخططات شريرة من اجهزة الامن للسيطرة على مثل هذه العقليات بواسطة القمر الصناعى بس ده سر بينا و بينك متقولهوش لحد
4. يعنى انا مشفتش حد منكم قبل كده .. ولا عمرى شفت ليكم مقر ولا اى حاجة .. انتوا تلاقيكم تلاتة اربعة او خمسة على الكتير و عاملين فيها قال ايه حزب .. سؤال من الراجل اللى كان قاعد جنب المواطن فى البند 2 و 3
هما الناس الكبار فى الحزب للاسف ممروش بالاسئلة دى قبل كده فمحدش علمنا ازاى نجاوب عليها علشان برده الاحراج .. و عشان احنا حزب سرى – واخد بالك من كلمة سرى دى – يعنى معندناش مقرات ولا يا سيدى من حق حد يتكلم بأسم الحزب او يقولك انه فى الحزب علشان فيه اقمار صناعية بتسجل و كده – ده برده سر بلاش تقوله لحد – و يا سيدى ماشى احنا تلاتة بس الولة اللى كان واقف بيرن على خطيبته و الباقيين بيدونا مذكرات الامتحان اللى بعد بكره ده مش معانا علشان متظلموش
بلاش بقى توجع دماغك بينا و فيه حاجات اهم من كده ممكن حضرتك تركز فيها احسن
5. حزب طويل عريض و فى الاخر يعملى بلوج مش موقع محترم كده بدومين و تصميم و حاجات كده تخلى الواحد مننا عينه تزغلل ؟
هنعمل ايه يا حاج .. انا مرتبى 450 جنيه و مواصلاتى بتكلفنى 150 و الاكل و الشرب و السكن بالباقى .. لو تقدر تتبرعلنا ابقى ادى الفلوس للى كان بيرن على خطيبته فى البند رقم 4 و هو هيوصلنا الفلوس .. بس للاسف كمان مش معانا كريديت كارد علشان نشترى الموقع .. بتكلف من بنك مش حكومى اننا نفتح حساب بحوالى 3000 جنيه فى بنك السى اى بى تقدر حضرتك تتبرع بيهم .. بس المشكلة بقى كمان اننا لو اشترينا بكريديت عليها اسم اى حد هيتقبض عليه طبعا لأن اى دومين ممكن بسهولة تعرف صاحبه .. ممكن تأشيرة سفر تشينجين و وعد مش هنكسرها و هنرجع بعد ما نعمل حساب فى بنك من هناك .. كلك نظر بقى و الولة ممكن يعدى على حضرتك فى اى وقت ياخد تبرعك للموضوع ده و نبقى شاكرين جدا لحضرتك يا فندم
6. طب انتوا ناويين على ايه ؟
المفروض اننا ناويين على حاجات كتير .. بس مادمت حضرتك هتتابعنا على الموقع ده بس فانت مش هتشوف غير كلام كويس و جميل .. لكن لو عايز تبقى معانا فده موضوع تانى خصوصا اننا بتوع بقى نظرية ماركسية و شغل فى اتجاه تثوير – باحبها قوى الكلمة دى – تثوير المجتمع يعنى مش بتوع ثورات الاتصالات … لكن لو عايز تتابعنا على الموقع بس يبقى اهلا بيك برده صديق لينا بس بلاش تنسى تبقى تبعت تعليقاتك على الاقل على المواضيع اللى هننشرها
7. انا ضد الشيوعية و الشيوعيين ؟
و احنا مش ضد حد غير اللى واقف ضد الناس و مصلحتهم و حقهم فى حياة تانية غير الحياة اللى البنى ادم بيتولد فيها علشان يستنى دوره فى الموت و عشان كده احنا قرينا و درسنا و دورنا و فهمنا و عرفنا دورنا ايه بالظبط فى اننا نغير كل القرف و الكره و السرقة و القتل و الجهل ده بأننا نبقى موجودين فى صفوف حزب حقيقى مش مجرد حزب ورق خيبان .. حزب يقدر انه يبقى بديل لقهر الحكومة فينا و بديل لخداع القوى الظلامية لينا و لمساومة الليبراليين بينا … شفت المعادلة بسيطة ازاى ؟ احنا عايزينك تفضل معانا على الموقع و تتابعنا اول بأول علشان ممكن تغير رأيك لما تعرف اكتر عننا لأننا عارفين ان الناس واخدة فكرة عن الاحزاب الشيوعية فى مصر بشكل غلط تماما لأننا كنا زيك كده برده قبل ما نقرا و نعرف و نفهم
8. برده انا مش عارف انتوا عايزين ايه ؟
احنا قلنا اننا عايزين حاجات كتير .. بس الاساسى من الموقع ده هو اننا نوصل صوتنا للناس .. الناس مش عارفة عننا كتير و طبعا اى انسان بيبقى واخد موقف عدائى من اى حاجة مش عارفها .. فاحنا بس هنحاول نوصل ليكم عن طريق البلوج ده اخبارنا و افكارنا و كلامنا و احلامنا و يمكن النكت اللى بنقولها كمان – ليه لأ ؟ – يعنى حاجة زى نافذة صغيرة نقدر نوصلك بيها لأننا عايزين نبقى قريبين منك
9. طب انا عايز اتصل بيكم ؟
للاسف احنا منقدرش نعمل اى اتصال مباشر بيك خارج طريق الانترنت بس هتلاقى فيه صفحة للاتصال بينا تقدر عن طريقها انك تبعتلنا تستفسر عن اى حاجة بس مش هنقدر نساعدك فى موضوع الانضمام للحزب علشان احنا مش بنقبل اعضاء عن طريق الانترنت لأن الاعضاء عندنا لازم يتم تجنيدهم فى الحزب عن طريق اعمالهم و نشاطهم مش مراسلاتهم .. و ده امر احنا نفسنا اننا نغيره بس يمكن لما نقدر مع بعض اننا نغير شكل الحكم فى مصر بحيث اننا منبقاش حزب سرى و نفتح مقرات علنية لينا فى كل مدينة فى مصر تقدر ساعتها تتوجه على طول لأى مقر و تبقى عضو معانا .. بس قبل كده هيبقى صعب جدا .. لكن احنا بنعتبر كل زوار موقعنا من اصدقاء الحزب و ده معناه انك بنشاطك و فهمك للاوضاع و محاولتك لتغييرها و اطلاعك على ما يتم نشره فى موقع الحزب و فى موقعنا , تصبح صديق للحزب و ده بيبقى ليه كل صلاحيات العضو تقريبا و ليه الاولوية كمان فى بعض الاحيان
10. خلاص نبتدى بقى نجهز نفسنا علشان نكتب فى الموقع بدل ما احنا عمالين ندردش .. شوية شغل بقى بدل ما الكلام ياخدنا و ننسى اننا عايزين نقول كلام تانى اكتر
